Giraff

Weisch no denn, ufdr Safari? Woni di nid gseh ha - obwou du so hööch bisch. Hööch sy und nid gseh wärde - ufe erscht Blick e Widerspruch. Bi dir und bi mir isch das aber genau so gsy. Dis Gsicht isch sooo härzig. Weni di aluege, geit mir z Härz uf. We du dis Blatt vom Boum gnüsslech mit dire grosse, luschdige Zunge am Choue bisch. Das Bild gsehni viu - uf Postcharte. Sogar uf Postcharte hesches gschafft - so härzig gsehsch us. 

Es schiint, aus chönnt di nüt usdr Rue bringe. Es schiint, aus wär d Wäut und ihres Drumume i Ordnig. Gsehsch du vilech scho witer? Meh aus mir unger dir? Bisch du wäge däm so glasse? Heisst witr gseh ou witer ga? Heisst meh gseh Besserig gseh? Wes nid so wär, chönsch du, wo vo obe aues im Blick hesch, doch chuum so glasse id Wäutgschicht luege, oder?

    

                                                                Bild von unsplash kopiert

vo Hünd und Wasserspiel

 "Jööö, wie isch dä hääärzig". Dä Zwärgpudel mit Teddyfrisur - mi Lieblingshund. Naja, mi Partner seit, jede Hund sig ja mi Lieblingshund. Hünd, woni nid härzig finde, sige Looser-Hünd seiter. Het öbbis - Hünd mache mir Fröid. Und y wundere mi, wieviu luschdigi Rasse dases git. Deu si eher träg, angeri gischblig. S'git riisegrossi und ganz chliini, ziemlich dicki und spindeldürri. Aber jede het öbbis Gwunderigs.

Wasser abäue. Heter äch z Gfüu, z' Wasser bäui zrügg? Und de die Usduur. Wie lang luegeni jetz däm Wasser-Hunde-Spiu scho zue? Füf Minute? Oder doch eher scho 10? Het dr Hund tschegget, dases nie zure ächte Interaktion mit ihm und em Wasser wird cho? Odr isch das am Änd gar nid sis Ziu? 

                                                                Bild mit KI generiert (zuegäh: bitzli kitschig..)

Wunder-Bar

 Mi het z Wort wunderbar grad sofort agsproche. Wunder hei öbbis Magischs, Positivs und Magie chani i mim Autag guet bruuche. Meh Glitzer, Feestoub und meh Einhorn, weniger Hamsterrad.

Im Wort wunderbar chunnt ou z Wort bar drinn vor. E Bar, oder ou e Beiz - ghöre zu mine liebste Ort. Härehöckle und d Lüt beobachte. Sech wundere, was die aues beschäftiget. Mitne dür ihri Gedanke wandere, stiu, anonym und doch vou drbi. 

Vili erfougriichi Schriblüt hei ihri Zyt ir Bar oder ir Beiz verbracht: Peter Bichsel, Pedro Lenz. Vo däm här wäri quasi prädestiniert fürne erfougriichi Schribkarriere...

Öb dr Marcel Huwyler sini Idee ou ir Beiz fingt, weisi nid. Aber är wunderet sech ganz sicher ou übers Autägleche - z eigete und das vo dene drumume. Vo Wunder zu Wunder wandere. Das isch no e schöni Idee. Und so würd sogar y - e Anti-Rucksack-Wanderfrou - gärn wandere. Wunderwandere quasi.

                                                            Bild mit KI generiert

Märit

 Im Karussell dräie, sich id Luft la katapultiere, Kamelrenne mache, Butschouto fahre

Zuckerwatte

Liebesöpfu

brönnti Mandle

Magebrot.

Glächter

schlächti Musig

Läbe

Lache

Luege

Märit. E bitz Gwunder und Wunder im Autag. E chliini, bunti Uszyt ihre düstere, dunkle Wäut

                                                Bild mit KI generiert

Luxus oder das Bergangaffen

Wenn ich so da stehe und den Berg anschaue, wird mir leicht schwindlig vor lauter Glück. Mein Lieblingsberg ist gross und dunkel. Der dunkelste von den dreien, die zusammengehören. Er scheint immer schon da gewesen zu sein und es scheint, als würde er die Menschheit überleben. Er ist erhaben, in sich ruhend und gewaltig. 

Meine Ski tragen mich, ich fahre immer wieder am Berg vorbei. Manchmal vergesse ich beinahe, auf die Piste zu achten. So sehr gaffe ich meinen Lieblingsberg an.

Dabei wird mir bewusst, was für ein Glück ich habe und dass dieses Bergangaffen purer Luxus ist. Sich bei Bier und Chässchnitte in die Sonne zu setzen, Berg anstarren und das Leben an sich vorbeiziehen zu lassen. Sich nicht fragen zu müssen, ob genug Geld für die Miete und die Krankenkasse vorhanden ist. Es sich leisten zu können, eine Tageskarte für die schönste Skiregion der Schweiz (vielleicht sogar der Welt?!) zu kaufen, sich in den Zug zu setzen und loszufahren.

Beim Bergangaffen werde ich beinahe demütig. Mir wird bewusst, um was es in meinem Leben gehen sollte: im Moment leben, den Moment geniessen. Dankbar sein. Spass haben. Und immer wieder "meinen" Berg angaffen.

E Bettgschicht - mit Riim

Jetz ischs klar: y stamme vom Sunnechünig ab. Dä isch ja schiins ou viu im Bett gsy -ja, dä het sogar vom Bett us regiert. Y mues somit zum Adel ghöre. Das erklärt, würum y und mis Bett so äng si. Eigentlech ischs ja nid mis Bett, sondern üses Bett. Während dr Maa z Bett v a zum schlafe brucht- ir Nacht notabene- cha y tagelang im Bett lige, True Crime Podcasts lose und vor mi häre döse. Dechi und Duvet über mir, e Spalt offe la zum Schnuufe - meh bruchi nid.

Mir isch scho klar, dasi nach stundelangem Umegammle nid wecher bi und dasi dr Autag mit au sine Verpflichtige nid eifach cha verschlafe - und umga ersch rächt nid. 

Aber es füeltsech haut sicher a- sigs im nöie Bett oder i däm vorhär. D Matratze isch jetz höcher- nei, kes Boxspringbett. Dr Maa vom Dänische Bettelager het gseit das sig e Seich-und mim Rügge geits besser.

Y bruuche öbbe 2/3 vom Bett. Y lige haubmondförmig - sit Bebe. Y ha es Sitteschläferinnechüssi, es riise Teil wo so viu Platz brucht, dases mängisch fasch chlei viu isch. Eigentlech brüücht y es mega riise Bett - es Bettzimmer quasi, woni aues cha dri due woni wot-näbschtem Maa no zig Plüschtier und äbe mis Sitteschläferinnechüssi. 

Füre Maa näbedra blibt nüm viu Platz - aber är het immerhin sit es paar Jahr sis eigete Duvet. Vorhär heter ke Platz gha - und chaut. Jetz heter immerhin warm.

und hie no dr Riim

Umegammle
Plüschtier um mi versammle
zwöi drü vier - ganz viu Tier
Öb Sunne oder Räge
dr Wäut da usse tschüss säge

Orangi Aasichte

So ganz glatt ischsi nid - dini Hut. Me gseht Näggi und Pore - si züge vore wite Reis. Beschwärlech vilech, sicher aber gäge di Wiue.

Du hätsch garantiert no chlei lenger bi dine Gspändli wöue blibe. Ir Gruppe, ar Sunne. Jetz bisch hie-ir Cheuti, im Näbu, ufm Märit oder im Supermarkt und wartisch druf, dasdi öbber uswäut. 

Wie isch das so, druf z warte, bises z Änd geit? Wüsse, das dis Daasy sehr begränzt isch. Und druf z hoffe, das die letschte Täg vo dim Läbe schön sy. 

Vilech landisch aus Saft bim Brunch oder imne Guetzliteig. Vilech verschaffsch amne Büezer paar gsundi C-Vitamine. Oder vilech gits irgend es französischs Ässe mit dir aus Zuegab. Sichr isch, dass denn für di fertig isch. 

A was dänksch i dine letschte Atemzüg? Griecheland, Spanie? Gwächshuus, offnigs Fäud? Y weises nid. Aber wasi weiss isch, das di Gschmack zum Beste ghört, wo y ir Früchteviufaut kenne. Ke Öpfu und ke Bire cha dir z Wasser reiche. 

Drum - merci, das du die witi Reis uf di gnoh hesch und mir e früsche Saft beschersch. Mit dir chumeni souverän dür d Winterzyt-schad, das üses gmeinsame Dasy nume vo churzer Duur isch.

                                                                Bild mit KI erstellt